Yeh nahi hai Shirk to phir Shirk kis ka naam hai? – یہ نہیں ہے شرک تو پھر شرک کس کا نام ہے؟

شرک کا لغوی معنی برابری جبکہ شرک کی واضح تعریف جو علماء کرام نے کی ہے وہ یہ ہے کہ اَللہ تعالیٰ کے کسی وصف کو غیر اللہ کیلئے اِس طرح ثابت کرنا جس طرح اور جس حیثیت سے وہ اَللہ تعالیٰ کیلئے ثابت ہے، یعنی یہ اِعتقاد رکھنا کہ جس طرح اللہ تعالیٰ کا علم اَزَلی، اَبدی ، ذاتی اور غیر محدود ومحیطِ کل(سب کو گھیرے ہوئے)ہے، اِسی طرح نبی اورولی کو بھی ہے اور جس طرح اللہ تعالیٰ جملہ صفاتِ کمالیہ کا مستحق اور تمام عیوب ونقائص سے پاک ہے، اِسی طرح غیر اللہ بھی ہے تو یہ شرک ہو گا اور یہی وہ شرک ہے جس کی وجہ سے اِنسان دائرۂ اِسلام سے خارِج ہو جاتا ہے اور بغیر توبہ مرگیا تو ہمیشہ کیلئے جہنم کا اِیندھن بنے گا۔اللہ تعالی نے قرآن مجید میں اور نبی کریم ﷺ نے اپنی احادیث مبارکہ میں جس قدر شرک کی مذمت اور توحید کا اثبات کیا ہے اتنا کسی اور مسئلے پر زور نہیں دیا ہے۔ سیدنا آدم علیہ السلام سے لے کر نبی کریم ﷺ تک ہر رسول و نبی نے اپنی قوم کو یہی دعوت دی ہے۔ زیر تبصرہ کتاب “یہ نہیں ہے شرک تو پھر شرک کس کا نام ہے؟” محترم محمد اشفاق حسین حیدر آبادی کی کاوش ہے، جس میں انہوں نے لوگوں میں پائے جانے والے مختلف قسم کے شرکیہ نظریات وافکار مثلا بشریت انبیاء، حیات النبی ﷺ، علم غیب سماع موتی، ندائے غیر اللہ، مشرکین کے معبود وغیرہ جیسی شرک کی اقسام کی قباحت اور حرمت کو بیان کیا ہے، اور مشرکین کے دلائل کا دو ٹوک اور مدلل رد فرمایا ہے۔