Sahih Ibn e Khizaymah (Urdu) – صحیح ابن خزیمہ (اردو)

امام ابن خزیمہ رحمہ اللہ کا شمار اکابر محدثین اور نامور ائمہ فن میں ہوتا ہے۔ احادیث پر ان کی نظر نہایت وسیع اور گہری تھی، فقہ میں بھی ان کا درجہ نہایت بلند تھا وہ کم سنی میں ہی امام وحافظ حدیث کی حیثیت سے مشہور ہوگئے تھے۔ ان کے معاصر علماء اور ارباب کمال ان کے علم وکمال کے معترف تھے۔ امام ابن خزیمہ محدث وفقیہ ہونے کے ساتھ ساتھ نامور مصنف بھی تھے، ان کی تصنیفات 140 سے زائد ہیں۔ زیر نظر کتاب صحیح ابن خزیمہ امام ابن خزیمہ کی سب سے اہم اور مایہ ناز کتاب ہے۔ اس کا شمار حدیث کی اہم اور معتبر کتابوں میں ہوتا ہے، حافظ ابن کثیر رحمہ اللہ کہتے ہیں کہ صحیح ابن خزیمہ نہایت مفید اور اہم کتابوں میں سے ہے، اس کتاب میں امام ابن خزیمہ رحمہ اللہ کی محدثانہ اور فقیہانہ صلاحیتوں کا بھرپور اظہار کیا گیا ہے، اس میں انہوں نے حدیث رسول کو موتیوں کی طرح ایک لڑی میں پرو دیا ہے اور فرامین مبارکہ سے علمی نکات کا استنباط کر کے امت مسلمہ کی راہنمائی کا عظیم فریضہ ادا کیا ہے۔ امام موصوف نے باطل فرقوں کارد خالص علمی انداز میں کیا ہے۔ کتاب کی افادیت کے پیش نظر اردو دان طبقہ کے لیے تخریج وتحقیق کے ساتھ طباعت سے آراستہ کیا گیا ہے۔ کتاب کے ترجمہ کی سعادت شیخ الحدیث مولانا محمد اجمل بھٹی نے حاصل کی اور فوائد کا فریضہ مولانا محمد فاروق رفیع نے سر انجام دیا ہے۔