Masnoon Rak’aat e Taraweeh aur Shubhaat Ka Izalah – مسنون رکعات تراویح اور شبہات کا ازالہ

صحیح احادیث کے مطابق رکعاتِ تراویح کی مسنون تعداد آٹھ ہے۔ مسنون تعداد کا مطلب وہ تعداد ہےجو اللہ کے نبی ﷺ سے بسند صحیح ثابت ہے۔ رکعات تراویح کی مسنون تعداد اوررکعات تراویح کی اختیاری تعداد میں فرق ہے۔ مسنون تعداد کا مطلب یہ ہے کہ جو تعداد اللہ کےنبی ﷺ سے ثابت ہے اور اختیاری تعداد کا مطلب یہ ہے کہ وہ تعداد جو بعض امتیوں نے اپنی طرف سے اپنے لیے منتخب کی ہے یہ سمجھتے ہوئے کہ یہ ایک نفل نماز ہے اس لیے جتنی رکعات چاہیں پڑھ سکتے ہیں۔ زیر نظر کتاب ’’مسنون رکعات تراویح دلائل کی روشنی میں ‘‘ جید عالم دین مولانا ابو الفوزان کفایت اللہ السنابلی کی تصنیف ہے جس میں انہوں رکعات تراویح کے سلسلے میں وارد   احادیث کی مکمل تحقیق پیش کرتے ہوئے ثابت کیا ہے کہ تعداد رکعات تراویج بشمول وتر کل گیارہ رکعات ہیں اور صحابہ کرام رضی اللہ عنہم کا عمل بھی اسی پر تھا نبی کریم ﷺ کا رمضان اور غیر رمضان میں رات کا قیام بالعموم گیارہ رکعات سے زیادہ نہیں ہوتا تھااور حضرت جابر رضی اللہ عنہ کی روایت کے مطابق رسول اللہ ﷺ نے صحابہ کرام رضی اللہ عنہم کو تین رات جو نماز پڑھائی وہ گیارہ رکعات ہی تھیں او ر حضرت عمر رضی اللہ عنہ نے   بھی مدینے کے قاریوں کو گیارہ رکعات پڑھانے کا حکم دیا تھا اور گیارہ رکعات پڑھنا ہی مسنون عمل ہے۔ امیر المومنین حضرت عمر بن خطاب رضی اللہ عنہ، حضرت علی بن ابی طالب رضی اللہ عنہ، حضرت ابی بن کعب اور حضرت عبد اللہ بن مسعو رضی اللہ عنہما سے 20 رکعات قیام اللیل کی تمام روایات سنداً ضعیف ہیں۔